Wednesday, June 08, 2011

Државата го уби или не?

Се уште е актуелен случајот со убиеното момче кое во неделата вечер, додека траеше прославата на политичката партија што победи на изборите, беше претепано до смрт на самиот плоштад од страна на вработен во МВР. Уште следниот ден почнаа протести на улиците против бруталноста на полицијата и за откривање на сторителот. Разгледувајќи ја целата ситуација не можам а да не ги споменам следниве работи:

1. Зошто МВР цели 24 часа и повеќе одрекуваше дека станува збор за убиство и се обидуваше да го прикрие случајот? Кога рекоа дека било пријавено мртво момче беше речено дека кај него немало траги на насилство (каква иронија). Зарем е можно МВР да не знае за што станало збор а таму имало очевидци што го виделе целиот настан? Дури потоа, кога се изврши медиумски притисок и кога почнаа протестите и кога се пријавил сторителот рекоа дека ќе бидат преземени соодветни мерки. Она што ме интересира е следново: Дали ако не се извршеше притисок ќе се прикриеше целата работа?

2. Дали државата го уби детето или не? Од една страна, државата секако дека не го уби детето, зашто се работи за поединец (вработен во МВР) што убил некого како изолиран случај. Но од друга страна, јас ли го вработив тој човек или државата? Така што, држвата и МВР да поминат без апсолутно никаква одговорност би било нонсенс. Работодавецот на тој човек мора да сноси морална одговорност.

3. Она што мислам дека предизвика да се вжешти атмосферата меѓу младите е фактот што вакви случаи (секако не толку екстремни што завршиле со смрт) се имаат случувано многу пати кога припадниците на алфите се имаат однесувано "несоодветно" па така тоа незадоволство се таложи веќе неколку години. Свесни сме за профилот на тие луѓе и за нивното однесување па кога се случи последново реакцијата беше, "До кога?!! Што е следно?!" Да не зборуваме и за стравот од полицијата наследен од времето на социјализмот.

4. Колку заслепен треба да си од политичките фактори во земјава за веднаш после почнувањето на протестите да кажеш дека имаат политичка позадина? Младо момче било ноншалантно претепано и убиено од припадник на полицијата. Дали треба да сум член на партија за да се разгневам и протестирам?

2 comments:

Anonymous said...

плитко размислуваш, дури и детски...

Urban Mystic said...

Анонимен, прво претстави се па после ќе видиме дали размислувам плитко или детски. Ако не, тогаш те молам воздржи се од коментари на мојот блог.